المرّة هذي انا داهش … عبد الكريم قطاطة

ثمة جماعة محسوبين على الثقفوت والديموخرائية وحقوق الانسان يكتبو في تدوينات ومواقف تدهشني بالحق ..يا امّا انا جاهل وناقض وعي …يا امّا هوما شيطوا بالانسانية … من حيث المبدأ انا مع ايّ انسان يتعرّض للظلم ..

لكن وهذا اللي نختلف فيه مع هاكوما الثقفوت انا ما نتحالفش مع ايّ فرد من برّة انسان ومن داخل شيطان ..وقتها نكون غبيّ لانو هاكة اللي من برّة انسان ومن داخل شيطان نهار اللي يصبح في موقع قوة اوّل حاجة يعملها يشنقني لانّي فقط اختلف معاه في مواقفي من عدّة قضايا ..

نعم المبادئ لا تتجزّأ ولكن المبادئ يلزمها تكون مع اناس يؤمنون بالمبادئ ..وصدقا انا داهش من البعض اللي يقولو حتى ولو نختلف مع عدوّي في مواقفو وقت يطيح يلزمني ناقف معاه .. زعمة زعمة انا انسان وما يلزمنيش نعاملو كعدوّ ..لا يا سيدي انا عدوّي نعاملو كعدوّ دون شماتة نعم ولكن ايضا دون بلاهة .. ومن البلاهة ان نستثيق الاعداء …يا ثقفوت ارجعوا للتاريخ توة تعرفو قداش من واحد استثاق عدوّه و بعد مشى فيها زيزي ..