“حـــلّ المِـزْلِـــس ” ومواقف ” العَـكْـــرِي”..الأستاذ نعمان مزيد

مصيبة كبيرة عملهـــا الإخشيدي ..
هاو قالو الفرنسيس والأمريكان والألمان متغــشّشــين علينا …
كيفـــاش يصير ؟؟ توة هــذا كلام ؟؟؟
مزلس أعلى للقضاء ويا من دراك يحلّـــو الرئيس..؟
تــي راهم ” الديمــــو ” متاع الديمقراطية وحقوق الإنسان وقلبـــهم دم على التوانســــة ..اللي خسرو مكسب هام متاع ديمقراطية وكـــذا…
وزيد لو كان ما يحبونا “المان وفرنسيس ما يزورونا” هه
الحق …الحق قلبي وجعني على تونس …
وبعـــــد تــفكـّــــــرت …
توّة بن علي وقت كان يعبر ويحكم في المحاكم والدوسيات متاع الطرابلسية زعمه تكلمـــت ها الجوقــــــة هاذي كلها ؟؟؟
على ما نتذكـــر ..إلى آخر أيـــامو والفـــرنسيس كانو ماشي يبعثولنا ” كولي” متاع قنابل مسيلة للدموع باش بن علي يواجه تحركات جانفي 2011 وإلا أنا غــــالط ؟؟؟
باهــي والأمريكــــــان متاع ” ربّ الديمقراطية وحقوق الإنسان ” ؟؟؟
على ما أعلم قوانتانامـــــو ومعتقــل أبو غريب موش التوانسة اللّي عملوه ؟؟
حاجة أخــرى ” بـــونيس Bonus ” ياخي حلفائكم في الإمارات والسعودية وقطر ومن والاهم عندهم ” مجلس اعلى للقضاء ” ؟؟ إيه آش عملتولهم …عبرتولهم على ” قلقكم العميق ” ؟؟؟
. .كنت باش نحكي على إنجازات وفضايل “المزلس “الأعلى للقضاء لاستماتو في محاسبة الفاسدين ومقاومتو للإرهاب وسعيو الدائم لتنظيف القضاء ومن بعد قلت ” اذكروا موتاكم بخير ” ..خلّي عزاها سكات …
نعمان مزيد