خرافات عمي الباشير الرمضانيّة : عضّ اذني واريد القصاص

يا سادة يا مادة يدلنا ويدلكم للخير والشهادة وخرافة اليوم قصتها غريبة وممكن تفسر شوية الي تعيشوه

زوز تجار تعاركو وباش كل واحد ياخو حقو مشاو للقاضي وحكاولو الحكاية الاول قالو سيدي القاضي رانا تعركنا صحيح لكن جاري عضني من وذني قريب يقلعها غزر القاضي للاخر وقالو علاش تعمل هكا سي وخينا نكر وشد في النكران وزيد قالو يا سيدي القاضي انا ما عضيتوش هو الى عض وذنوا وحدو

القاضي دهش وما عرف اش يعمل …حب يتاكد قاللهم لحظة تو نرجعلكم ودخل للخلوة وقعد يحاول يعض وذنو …حاول حاول وشيء جبد وذنو لين حمارت دور راسو لين كرومتو وجعتو هو يحاول عثر طاح سمعوا اللطخة دخلولوا لقاوه مسكين يتوجع ….وقاللهم نعترفلكم الي مستحيل الواحد يغض وذنو اما ينجم يكسر كرايمو كيف يتبع مهبلة كيفكم كل واحد منكم شهر حبس

وحديثنا قياس

وشاهيتكم طيبة

حافظ