شيء ينطّق ..رسالة مضمونة الوصول للبعض …عبد الكريم قطاطة
لا احد ينكر انّ الاوضاع في تونس مربكة للغاية .. لا احد ينكر انّ معيشة التونسي والحالة الاجتماعية اصبحت متدهورة ..ولا احد ينكر ايضا انّ الغد ضبابي .. اما نقرا في بعض التعاليق حول الاحتجاجات في الشارع ويقارنو فيها بما وقع سنة 2011 .. في هذي تغلطو وحساباتكم خاطئة تماما لسببين ..
1 ايّ احتجاج من مواطنين لا علاقة لهم بالسياسة هو حق شرعي ..البقية اصحاب الاجندات المعروفة والبالية والبعض من النخبة النكبة .. راهي اضغاث احلام …
2 وهو الاهم الاحتجاجات متاع 2011 وما قبلها 78 و84 وما بعدها 25 جويلية 2021 نهارا كانت في كل المدن التونسية ..وقتها نحكيو وحكينا على احتجاجات شعبية عامة شاملة .. الان محصورة في العاصمة ومع نفس الوجوه تقريبا .. اناس افلسوا في السياسة ومازال الطمع هاززهم .. معناها جماعة يحلبوا في حلّاب مقعور ..
اعود للقول سنة 78 وسنة 84 وسنة 2011 ويوم 25 جويلية 2021 نهارا كانت هبة شعبية ..كانت نشرة اخبارية لكامل التراب التونسي ..اليوم موجز انباء محلّي ..وموش عجب موجز انباء لشارع من شوارع العاصمة .. لهالدرجة ما فهموش ؟؟
هوما فاهمين والله اما يستبلهو في ارواحهم وفي الحويرات من انصارهم .. الشعب استبلهتوه قبل وماعادش تنجموا تعديوها عليه .. ومرة اخرى نذكّر اني عمري ما كنت من انصار قيس وما انتخبتوش ومازلت عند رايي تونس تستحق رئيس افضل …لكن بقيت على عهدي .. ايّ حاجة تهم تونس نكتب عليها ودائما حسب تقديري المتواضع للامور .. وربي يحمي تونس من اعدائها في الداخل والخارج …
23 ماي 2026 .
مواضيع ذات صلة
