صفاقس أكبر منّا الكل… و”السي آس آس” عمرها ما كانت ميدان للمزايدات….اشرف المذيوب

الحملة الي صايرة تو باش تتلمّ فلوس لمساعدة النادي الرياضي الصفاقسي في حدّ ذاتها مبادرة باهية وكل واحد يحب يساهم مرحّب بيه. أما الطريقة اللي ولّينا نشوفو فيها الأمور بصراحة ما تشرّفش لا صفاقس ولا جمهورها.

كل واحد يرمي الكرة للآخر وكل واحد يحب يبين للناس اللي هو أكثر واحد يحب CSS والصفحات ولات تتناوش وتزايد على بعضها وكأنّو الهدف ما عادش إنقاذ الجمعية بل جمع الإعجابات وكسب الشهرة .

النادي الرياضي الصفاقسي أكبر من الأشخاص وأكبر من الصفحات وأكبر من كل من يحاول يستغل اسمو باش يصنع بطولة وهمية.

اللي يحب يعاون الجمعية المقر معروف و ادارتها معروفة يمشي يساهم و يخرج… من غير تصوير، ومن غير مزايدات، ومن غير تشويه لبعضنا .

الي ماشي يعاون عمرو ما كان بالشوهة والمحبة الحقيقية للنادي تتقاس بالفعل موش بالاستعراض.

اللي صاير اليوم بكل صراحة مهزلة بكل ما تحمله الكلمة من معنى. وإذا باش نواصلو بالعقلية هاذي باش نزيدو نفرّقو الناس أكثر ما نجمعوهم.

ربي يبقي علينا الستر… و ربي يحفظ صفاقس والنادي الرياضي الصفاقسي و انشاء الله نكونو ديما يد وحدة و السلام.