صفاقس: معاناة المواطنين مع تجاوزات باندية شاطئ الشفار

يبدو أن شاطئ الشفار المتنفس الوحيد للصفاقسية يلفظ آخر أنفاسه بسبب إهمال المسؤولين بالجهة فالتجاوزات فاقت حدود الوصف ابتداء من باندية الباركينغ وصولا الى باندية الشاطئ معاناة يعيشها المواطن ذنبه الوحيد انه سولت له نفسه السباحة في بحر الشفار و في ما يلي شهادة إحدى السيدات تروي ماعاشته

حبيت نحكي على حاجة شفتها ليوما:

ايا يا سيدي ما غير ما نحكيلكم عاد عالسخانة وكاي مرأة تونسية موش خرنانة قعدت نقرقر باش نخرج نبحر خذا بخاطري الرويجل وهزينا هاكي لبرسول و طويولة والكراسي وصغيراتي وقلنا برة نعملو غطسة في هالعشوية اكيد ما عندناش برشة اختيارات وخاصتا عشوية قصدنا ربي لشفار قلنا برة نقربو شوية وندخلو للشفار لقديم ودخلنا وكي العادة الله لا يقطعلنا عادا عرضنا السيد متع parking الي اللطف ملثم بكلو وجهو كامل لافو بمريول أخضر شعشوعي و برطيلة على راسو و lunette على عنيه يعني كان تعرضو مرة أخرى والله لا طلعو وقللنا 1.500 parking الي انا لحق ما شفتوش هالبارك ودخلنا شدينة الشيرة ليسار نلقاو قال هو مخيم وكان تحب تراكي تدفع 3د ايا قلنا موش لازم خلي نشوفو الشيرة لخرة ومشينا ودخلنا للبحر بعد ما قينا فلة شقينا منها بين البرارك اللوح و القصدير وما نكذبش فما الي مبنى سيمان لحق اول مرة في حياتي نشوف pied dans l’eau هكةبلاصة وين ترشق باراسول ما فماش و بنيات بنيات كيما قلتلكم قصدير و لوح وووووووسؤالي هوني آخي كيفاش بناو آخي نجمو نشريو هكة بلاصة عالبحر هكة ولا في وسط لبحر كيمة قلتلكم فما contrôle فما بلدية فما شكون مرخصلهم خاطر كان الدنيا سايبة خلي نهزو شوية لوح وقصدير ونبنيو كيفهم بربي الي يعرف يفهمنينسيت ما قلتلكمش الي رجعنا من حيثو اتينا خاطر بالرسمي بلاصة وين ترشق باراسول ما فماش واحد يجيشي قدام رزق الناس ويقعد وهو كان قعدنا راهو كوشي فالبحر اما لحق خفنا يطلعوشي مالكينو زادة.

وقد تحدثنا قبل دخول فصل الصيف عن  شبهات فساد كبيرة تحوم حول استغلال الشواطئ في كل موسم صيفي وجب تسليط الضوء عليها ومراقبة تراخيص الاستغلال هذا ان وجدت طبعا و تطبيق القانون على المخالفين و ردعهم حتى لا يكون المواطن البسيط ضحية ككل مرة في عاصمة التهميش.

لكن يبدو ان آذان المسؤولين صماء عن مشاكل الجهة…

هاجر بن عمر