عبد الكريم قطاطة : وقّف الضرب يا سيادة الرئيس…

بعد ما حدث اليوم في مقابلة النادي الافريقي ومضيّفه الاولمبي الباجي اتساءل _ شنوّة اللي مازال ما صارش في كورتنا المحنونة المجنونة المعفونة ؟؟ اصلا ثمّشي واحد يفسرلي شنوة اللي صار وعلاش صار ؟ الاولمبي الباجي وهو في قمّة نشوته بعد الاطاحة بالترجي امتاعا واقناعا في نهائي الكأس ..معقول انو جمهورو اذا كان اللي ضرب من جمهورو يفشّخ راس ممرن الافريقي بالحجر ؟؟ اذا فهمتو فهّموني ..

واعود للتساؤل ..شنوة اللي مازال ماصارش في كورتنا ؟؟ كورة المنشار والحرائق ؟؟ ..كورة الصفع يولّي عندما نترجمه حسب الرابطة للعربية القحّة يولّي دفع ..؟..ويطلع من غادي الموريتاني ولد بوه يقول شنوة تحكيو على التقرير التكميلي ؟؟ عمري لا عملت تقرير تكميلي ظهر ولد بوه بالحق وتخرج الرابطة تنشر نسخة من التقرير التكميلي ويا ليتها ما فعلت .. وتهبط عليها الطامة والعامة وتقوللها كفى تدليسا ..كورتنا منذ بداية عهد منظومة الجريء نكتبو عليها وعلى تلاعبها ومحاباتها و على سياسة الالف مكيال و على مخالفاتها القانونية مجلّدات ودليل وحيد على تلاعبها بالقانون تكسير شوكتها من طرف هاكة الراجل الشابي المكشّر وفي مناسبتين وقد تأتي الثالثة في 12 جوان المقبل …. ايه ويييييييييييييين ماشين ..؟؟…..

يا سيادة الرئيس وانت بيدك كلّ السلطات وقّف الضرب والاصحّ حان وقت الضرب بقوة على ايادي كلّ العابثين وابدأ بيّا انا ان كنت من العابثين ….وقف ايّ رياضة فيها عنف ..الغ البطولة ..قرار تقول علينا الفيفا هذا تدخّل سياسي في الرياضة …طزززززززززز في الفيفا ..روح مواطن تونسي من ايّ جهة اثمن من الفيفا والكاف وكلّ الهيئات الدولية ..نخسرو خمس سنوات كورة خير مللي نخسرو ارواح بشرية .. واذا تواصل الصمت الرهيب حول هذا الارهاب الرياضي فذاك يعني فقط روح ذبابة اثمن من روح مواطن تونسي …

سنة 71 الزعيم بورقيبة حلّ الترجّي بعد احداث العنف في نهائي الكأس مع السي اس اس ولولا حنّية وسيلة وجمهور الترجّي يترجّاها وهي صحبة الزعيم في السيارة المكشوفة بمناسبة عودة الزعيم من الخارج بذلك السلوقون التاريخي _ الترجّي يا وسيلة .. الترجّي يا وسيلة .. وفعلا حنّ فؤاد الماجدة ورقّ قلبها ونزلت الدموع رقراقة من عينيها وفي رواية اخرى اغمن عليها اغمن عليها وكانت واسطة خير لاثناء الرئيس عن قراره وقال في خطاب وهو يعيد الترجي للوجود .. انحيوها الكورة موش لازمة اذا توصل بينا الى العنف والتطاحن فهمتو اش معناها رجل دولة رغم كلّ عيوبو … ؟؟؟ صار والا ماصارش يا اعداء بورقيبة ؟؟ ….لعنة الله على هذه الكورة وعلى كلّ المتسببين في تدهورها رياضيا واخلاقيا وتسييريا …