عصام الشوالي يا قادم لينا ما تفارق ” صفاقس البية”

الصفاقسية رجعوا شغفنا و جددوا حبنا للمنتخب، الحكاية موش 22 سنة علي اخر ماتش في المهيري و لا 31 عام تعدى علي اخر ماتش رسمي في عاصمة الجنوب، الحكاية محبة للكورة و المنتخب، جمهور صفاقس وصل رسالة أننا نستحقوا مدينة رياضية قادرة على احتضان كبرى التظاهرات الرياضية، صفاقس تحتاج الي مشروع كامل الاوصاف، مدينة رياضية فيها الصالة و المسبح و الملعب، نتمني نشوف بطولة افريقيا فولي في مدينة تعشق الكرة الطائرة، نحلم بالعاب متوسطية كانت صفاقس انسحبت من سباقها لفائدة وهران خاطر مافما شيء حاضر، ماتش ليبيا و اختيار الجامعة كان موفق، الرجة النفسية صارت و الجمهور جاء بقوة و متاكد لو الملعب يهز 30 الف كان يتعبي، أن شاء الله البنية التحتية تتطور و كيما في فترة كنا مضرب امثال من الاشقاء القراب و البعاد ، بذكاء و تفعيل الديبلوماسية الرياضية نجموا نرجعوا، المهم الارادة، الحقيقة لليوم مازالت الصور و الأجواء القادمة من صفاقس مسيطرة على قمة تونس / ليبيا، و لكن مع اقتراب الماتش بدا الستراس يطلع، ماتش مصيري لمستقبل الكرة التونسية، الجمهور جاء و بقوة و الملاعبية ما عندهم حتي عذر المرة هاذي ، شوفوا الناس ايش عملت بش تحضر الماتش، كونوا “رجال” و بقدرة ربي لاباس!المنتخب ملك التوانسة الكل و يلزم الي عملناه في المهيري نعملوه في ستادات داخل الجمهورية باش الناس تعيش غرامها و حبها للمنتخب !!