علاش ما توليش البوسطة بانكة؟؟….أحمد فهمي بوجلبان

• عندي حساب جاري في البوسطة ، نخدم مريقل و جوي باهي ، و نحب نبدل التالفون متاعي و نحب من توة نبرمج للخلاعة ؟ العادة عندي كرني متاع شيكات و الأمور مريقلة ، و السنة موش عارف اش نعمل ؟ و زيد البوسطة متعطيش قروض !
• عندي سنين و شهريتي تتصب في البوسطة، حتى بعد التقاعد كيف كيف الجراية ديما تتصب في كونتي ، الحقيقة عمري لاخذيت قرض ، السنة احتجت لمبلغ موش كبير في حدود 5000 دينار باش نعاون الوليد في عرسو ، البوسطة متعطيش قرض و انا منحبش ندخل تحت البنوك و قصاصات البنوك ! زعمة شنوة الحل ؟

هذه بعض الاشكاليات إلى يتعرضلها برشة توانسة و الا هما بالأساس حرفاء متاع بوسطة، و إلى تعرضوا لبرشة مشاكل بسبب قانون الشيكات الجديد و عدم قبوله كضمان، و كذلك عدم توفير حلول على شكل بطاقات تعتمد على مثال BNPL أو قروض قصيرة المدى .
و بما انو البنك المركزي معطاش رخصة احداث بنك للبريد التونسي و بما انو وزارة المالية متحبش البوسطة تولي بنكة، و بما انو البوسطة تربح كل عام في برشة فلوس، زعمة علاش ما يتعملش قانون كيما قانون 41 لسنة 2024 و يعطي ترخيص للبوسطة باش تعطي قروض صغيرة لحرفائها و بطاقات تمكنها من سداد المشتريات متاعها ، و هكة اولي فمة بديل حقيقي للشيكات مؤجلة الدفع الممنوعة حاليا؟
موش كان نمولوا استهلاك المواطن التونسي و نحركوا شوية الدورة الاقتصادية خير من تمويل مؤسسات فالسة و الا نعاونو مؤسسة صغيرة افسدها مالكها بسوء تصرفه ؟
زعمة موش هكة خير ؟