على ضوء فانوس : الله يرحم من قرّا وورّا….رياض يعيش

كان تحب تشرب الماء صافي شوف مجراه… وكان تحب اتشد الغزال تبع خطاه. وعمرك ما تقول كلام وما تعرف معناه… لازمك كلام موزون وزيد ثبت معاه! اللي نساك نساه وما تخمم فيه… وخليه للعالي يتكفل بيه. وقول فمي مغلوق وقلبي صندوق وربي من فوق يخلص الحقوق…. محلاه كلام الاجداد كي نغربلوه بغربال … كلام يجينا في شكل مَثَل وهو عبارة على حكاية في كلمتين… كلام مزيان ومليان وفيه برشة حكمة وبلاغة… المثل هو خلاصة تجارب ناس من قديم زمان… كلام مطروز ورزين في شكلو ومعناه…واللي في القلب في القلب. واللي ما يسمعش كلام كبيرا الهم تدبيرا واللي شاهي شهوة يديرها في عشاه وإذا عييت احسب روحك كيف بديت وإذا فاتك الكلام قول سمعت وإذا فاتك الطعام قول شبعت وإذا دزوك وطحت احسب روحك تتزرزح…. والله يرحم من قرا وورا.