مش نحكي على نهاري كيفاش يتعدّى كمواطن تونسي عايش في صفاقس…اشرف المذيوب

تقوم الصباح بش تمشي تخدم تخرج من الدار تلقى السخانة موش عادية وعروقاتك تتصبّب من غير حتى مجهود تقول يا ربي العمال عليك و تشدّ الثنية في الكياس تلقى العباد الكل على أعصابها وحسّ التزمير ما يوفاش.
توصل للخدمة تتعدى تمشي باش تاخو قهوة ودبّوزة ماء… تلقى الماء موش موجود و تتلزّ تاخوها مالقهوة بـ2000 وتشربها وتقول: ربي يقوّينا على هم الدنيا.
تكمل تتعدّى باش تاخو باكو دخان… ربي يقوّينا زادة باش نبطلوه تقلو : باكو فراي شوب يقولك: مقطوع…سلعة ما فماش تقلو باهي باكو كمال تونسي اقلك ناقص و سومو ب 11دينار تتلز كالعادة تاخوه.
ترجع للخدمة باش تعمل كيف تلقى الضوء مقصوص تتلزّ تقعد البرّا في الشيلي… يعني بعد هاذا الكل حتى الكيف طار.
وزيد بعدها عصب الخدمة، الضغط، والعوج… وتكمل نهارك بالسيف.
تروح للدار تلقى الماء مقصوص لا دوش، لا راحة الحاصيلو ما نطوّلوش عليكم بالحديث…تعدّي سويعات مع العائلة والصغار وتخرجهم شوية أما حتى البلاد اللي تخرج فيها تلقاها تعبت من الظلام والاستغلال و قلة الحياء .
بعدها تروح للدار باش ترقد من كثرة التعب
مازلت كي تتكّى شوية على نسمة الكليماتيزور وتاخذك عينك وتبدأ تحاول إنك تحلم…
يقصّ الضوء
ومن غير حتى إعلام مسبق تلقى روحك داخل في حرب جديدة بين صغار تبكي من السخانة وبين شبابك مسكّرة بالميشلار اللي ما يتحلّوش عندي كان بالضوء وبين إنك تحاول تشرب شربة ماء من السبالة بحكم انو الواحد ايس من التلويج على الدبابز و أنا عندي آلة تصفية و تلقاها تمشي بالسيف خاطر الماء ضعيف والموتور مقصوص عليه الضوء.
وتقعد هكّاكة بالساعات… تستنّى في الضوء باش يرجع
و بعدها تتلوّح كيما جات في البيت وترقد.
وكالعادة…
إنت مازلت كي تبدأ باش تحلم وينوقز التاليفون و يقلك قوم اخدم يزيك ما رتحت.
الحاصيلو الواحد في تونس اليوم لا عاد يحلم وهو صاحي لا عاد يحلم وهو راقد 👌
والسلام.