من حقّك .اما زادة موش من حقّك … عبد الكريم قطاطة

انّك تكون ضدّ قيس سعيّد عادي وطبيعي ومن حقك .. لكن في المقابل ثمّة زوز حاجات موش من حقّك ..1 موش من حقك تستقوى بالاجنبي على بلادك ..تلك خيانة وما عندهاش حتّى مبرّر .. 2 انو عداواتك لقيس سعيّد تخلّيك تدافع عن الشياطين ..ثمّة ناس اجرموا في حقّ تونس ومن غير توكويكوتبرير جرائمهم واضحة وضوح الشمس .. تجي سيادتك لانك لا تتفق مع قيس سعيّد في تسييرو للبلاد _ وانا من تلك الفئة التي لا تتفق _ _ وتحاول تبرّئ تلك الفئة المجرمة وتبدأ تحكي على القضاء وبيه وعليه وتخلق في التعلّات تنكيلا فقط بقيس سعيّد .. انت شنوة عملت وقتها؟ نقلك انا شنوة عملت ؟ انت اذنبت في حقّ بلادك وانت فقط عميل لاجندات داخلية وخارجية ..وانت عمرك لا حبيت بلادك ..وانت عمرك لا قريت كلام خالقك _ ولا تكتموا الشهادة ومن يكتمها فانّه آثم قلبه .._ متخاصم مع قيس سعيّد من حقك اما تتخاصم مع خالقك ؟ مسكين ابن آدم من اجل السياسة والسياسيين يغلط في حقّ بلادو و خاصّة في حقّ ربّ العالمين .. طبعا اذا كان مؤمنا بربّ العالمين _ وبرشة منهم وبدعوى التقدمية والثقفوت والنخبوية ..الله والقرآن والدين عندهم حاجة انتيكة …..28 جوان 2026