نهاركم محبّة ما توفاش….الفة يوسف

الحياة صعيبة لكن موش بنفس الدّرجة على النّاس الكلّ…لذا نتصوّر من المفروض أنّه اللي حياتهم أسهل يعملو مجهود مع اللي حياتهم أصعب…

الصّدقة موش فقط عطاء ماليّ وإنّما عطاء نفسيّ أيضا، أنّك توسّع بالك على قريب تعرفه في ضائقة، أنّك تبتسم لشخص مأزوم (وهنا نتذكّر الحديث المنسوب للرّسول عليه الصّلاة والسّلام: تبسّمك في وجه أخيك صدقة)…أنّك تتفهّم شخص عنده مريض وتعدّي له التّوتّر متاعه، أنّك ما تردّش بالإساءة لشخص شتمك في الافتراضيّ لأنّه واضح اللي ما زالت ثنيّة الطّمأنينة قدّامه طويلة، أنّك ما تشمتش في شخص موجوع حتّى لو كان تتصوّر أنّه “يستاهل” الوجع متاعه إلخ

طبعا كلّ شخص بالنّهاية حرّ في اللي يعمله…لكن أكيد أكيد…اللي ربّي أغدق عليهم النّعم ما فيها باس كان يشاركو بعض ها النّعم مع اللي مرّوا بمواقف صعيبة…وهذا معنى آخر للصّدقة…

نهاركم محبّة ما توفاش