هم باعو لنا التكنولوجيا… ونحن بعنا لهم عقولنا…اشرف المذيوب

الي جبد انتباهي في الصورة هاذي الي عرضتني هي المرا وبنتها… يظهر عليهم من اليابان ولا من الصين أي من شعوب كانت ومازالت من أكثر الشعوب تقدّمًا في العلم والتكنولوجيا

أما المشهد الي شدّني موش وجودهم في عيادة بتونس… الي شدّني هوما شقعدين يعملوا وهما يستناو دورهم عند الطبيب.

قاعدين يقروا في كتب

لا تلفونات في أيديهم، لا تصوير، لا حديث فارغ… فقط الام و بنتها يستغلو في وقتهم بالقراية و هوما يستناو في دورهم .

وهنا الصورة بالحق توجع

خاطر كي تشوف تونس اليوم بكبيرها وصغيرها في الشارع، في القهاوي، في وسائل النقل وحتى في قاعات الانتظار، انك تشوف عباد تقرى في الأماكن العمومية نادرة برشا باش ما نقولش مفماش جملة .

التلفون ولى أقرب لينا من الكتب… ولى يرافقنا في كل لحظة وكل حاجة تقريبًا لازم نصوروها ونهبطوها ونشاركوها حتى ولات حياتنا اليومية أحيانًا مجرد محتوى للعالم الافتراضي.

المشكل موش في التكنولوجيا

المشكل الي احنا ما نعرفوش نستعملوها

الشعوب الي صنعت التكنولوجيا، استعملتها باش تختصر الوقت، تطوّر العلم، تزيد المعرفة وتخلق المستقبل.

وإحنا للأسف استعملناها باش نقتلوا الوقت، نستهلكوا المحتوى ونعيشوا أكثر في العالم الافتراضي و التفاهة الرقمية.

يمكن أقسى جملة نجم نقولها و تختصر الفرق الي هوما تفنّنوا في طلب العلم فصنعوا التكنولوجيا وباعوها للعالم…

وإحنا تفنّنا في استهلاك التكنولوجيا و سلمنا عقولنا و رواحنا ليها .

باش تتطور راهو موش كان بالتاليفون الي في يدك…

راهي تبدا من الفكرة الي في مخّك و في الكتاب الي تقراه و في السؤال الي تسألو.

هاكا علاش حبيت نشارك معاكم التصويرة هاذي باش برشا عباد تفهم الي عقليتنا و تربيتنا هي الي تصنع الفرق