وين ماشين ؟؟ والله لا نعرف…عبد الكريم قطاطة

تتذكّروا عام 2012 وانا زعمة زعمة عامل فيها بطل ونفهم شويّة في اوضاع تونس السياسيّة وفي ايّ حلقة من برنامج اذاعة بالالوان نختار موضوع ونبدا بيه الحصّة متاعي اللي يسمويها توة الدخلة بما انّي اؤمن بصحافة المواقف …؟؟ تتذكّروا ؟؟ تتذكّروا الدخلة متاع وين ماشين ؟ ؟

وفيها مجموعة زفرات وانين حول اوضاعنا الدرامية وقتها تتذكّروا ؟؟ توة وانا نشوف شنوة قاعد يصير محلّيا ودوليّا تخيّلت روحي امام المصدح وانا نعاود دخلتي وبنفس العنوان _ وين ماشين _ اكيد توة نكون طلّعت عنوان الدخلة وبعد اختصرت الموقف في _ والله لا نعرف _ وطلّعت اغنية عماد عبدالحليم { الضباب } موش على خاطر عندي مشكلة في عيني اليسار التي اضربت منذ اشهر عن الرؤية .. اما لانّو عقلي اصبح عاجز عن الرؤية وحتى عن الرؤيا ..

بالحقّ والله لا نعرف … وساعات ندهش وساعات نضحك على اللي عاملين روحهم فاهمين .. صحة ليهم ربي ما عطانيش الذكاء والعفرتة او حتى التمظهر متاعهم خوكم زوالي ومدكّ .. وهو .اما نختم هالضباب بخبر سعيد اطلاق سراح الرئيس السابق للنادي الصفاقسي السيد عبدالعزيز المخلوفي والعاقبة لايّ سجين مظلوم ومهما اختلف معه في اشياء واشياء .. انا كنت وسابقى مع المظلوم وضدّ الظالم.