يا حسرة كيف كان العوج يزوّقوا منّو كان البقر …عبد الكريم قطاطة

عندي مدّة ما كتبت حتى شيء على فريقي وعشقي النادي الصفاقسي ..خليوني في البداية نقول انّو الكحلة والبيضة منذ مواسم اصبحت فريقا متوسّطا لا غير ..هذي التدوينة ليست لمعالجة هذه الوضعية واللي اسبابها متعددة وليست خاصة بالنادي بل بكلّ الفرق دون ايّ استثناء ..وما يغركمش الناس اللي تستثني فريقا واحدا ..واتذكروني واتذكّروا هالفريق في مقابلات الشمبيون زليغ ..بايجاز تونس على مستوى الفرق كلّها تعكّز ..اذن وين المشكلة ؟؟

المشكلة انك تعيش هالتعاسة ويجيووك حكام اصلهم تارزيّة يفصلو ويخيطو كيف ما يحبو وعندهم انسابهم هاكومة الخرونيكورات ويلقاوها من الجنة والناس موش حبّا في الحكم ودفاعا عنه وعلى راسهم المزهمل الزهمول اما نكاية بحارس مرمى اسمو دحمان انا اتفق جدلا انو دحمان غلط .. ايه نذبحوه ؟

ما هوماش هاضمين كيفاش هو الحارس الاول في المنتخب اذن فرصة لابعادو هذوما يحبو تونس ؟؟ وزيد ماهوماش هاضمين انو ممرن الفريق الوطني من فريقو .. ومساعد الممرن من فريقو وممرن الحراس في الفريق الوطني من فريقو .. والمسؤول عن اللياقة البدنية من فريقو .. غصّة في قراجمهم تجاه الفريق وتجاه الجهة ..وين تحبونا نمشيو ؟ نحرقو ؟ نهجّو من هالبلاد ؟ لا لا ..احنا اولاد تونس وما احناش جالية .

كيف ما تبوّع بيها احدهم هاكة العام .ونؤمنو بتونس وبعلمها ونخدمو على ارواحنا ونربيو صغارنا على حب العلم والعمل ونعرفو انو حتى وقت نهزّو لقب مرّة في كلّ ال 10 سنين نتسماو عملنا انجاز في ظلّ ماكينة كرة القدم المافيوزية بكلّ مكوّناتها ..وسنبقى جاثمين على صدور كلّ من يكرهنا وموتوا بغيضكم … العوج يزوّق منّو البقر ..هاكة زماااااااااان ..اما -توة البقر فهم اللعبة وقاللنا انا تعبت من التزويق .. نعم هو تعب اما احنا ما نتعبوش ..واللي يستنانا باش نتعبو عمرو لا عرفنا .. نحن كما قالها الشاعر يوما وهو يحكي على الوان الغالية _ بيضُُ صنائعنا .. سودُُ وقائعنا .. خضر مرابعنا .. حمرُُ مواضينا… لاعدائنا اقول ارجعو للتاريخ الكروي لنادينا ..تتجبروا وتفرعنوا سنوات وفي مقابلة واحدة منذ عبدالوهاب الطرابلسي 71 حتى زبير السافي 2004 نخلّصو القديم والجديد ..لانّو ربّي في الوجود …وغرغر يا غراب انت وسناقرية ووبقيّة الشلّة ..4 نوفمبر 2025 …وزايد راهو ما نقبلش دعوات صداقة من اشخاص حساباتهم مغلقة …