أعرف حقك … النفقة …مع سامي القلال

سمير ومنيرة عرسو توة من 12 سنة، جابو فيهم زوز نوارات محمـد ومريم، سمير، عامل يومي كيما نقلوها خدام نهار، ينطر الفرنك أما الفرنك إلي ينطرو يمشي في الفساد ومهمل مرتو وصغارو وقليل وين يتفكرهم وإلا يفرحهم بحاجة.

نهار وأنا في الحومة نادتني منيرة وسألتني: وليدي كان تسمح إنت ولد الدار ونحب نستشيرك في حاجة.

قلتلها: على ما نقدر بالطبيعة تفضل.

قالتلي: وليدي سمير  كيف العادة ناسينا ولا يصرف عليا ولا على صغارو وفلوسو الكل ماشية في الفساد ما لقيت معاه حتى حل وهذا عيد والصغار تحب تفرح كيف أندادها بدبيشات وشوية لعب وحتى قرايتهم الله يعلم كيفاه قائمة بيها…

قلتلها: الحل موجود، وهو أنك تقوم بدعوى في النفقة.

قالتلي: وكيفاه تصير هاذي دلني، ما لقيت معاه حتى حل بالحسنى؟؟

قلتلها: هي دعوى تم قدام قاضي الناحية إلي يتبع هذي المنطقة أما لازم تبعثلو عريضة قبل 3 أيام على الأقل تستدعيه فيها لجلسة صلحية وتنجم تعمل محامي كيما تنجم تقيمها وحدك أما انا ننصحك تعمل محامي خير باش تضمن حقك وتم الإجراءات بالصحيح.

قالتلي:  وشنية الأوراق إلي لازمني نحضرها؟

قلتلها: بالنسبة للاولاد مضمون الولادة لكل واحد منهم وشهادة في التعليم سواء شهادة ترسيم وإلا شهادة حضور  وعاهم عقد الصداق وإلا شهادة زواج وإلا مضمون الولادة.

قالتلي: وكيفاه تتقدر النفقة ؟؟

قلتلها: تتقدر النفقة حسب امكانيات سمير المادية (دخله الشهري-املاكه..)، وما يقدم من مؤيدات اخرى في الغرض وحسب حالتك إتن والأولاد (السن – الحالة الصحية – الدراسة – مستوى العيش الذي تعود عليه..) وزادة حسب حالة الوقت والاسعار (الاسعار المعمول بها – مستوى العيش – الجهة إلي تسكنو فيها) ومعلوم النفقة يشمل كل ما يتطلبه العيش الكريم ليكم من طعام وكسوة و مسكن وتعليم وعلاج و كل ما يعتبر من الضروريات في العرف و العادة.

قالتلي: وبعد ما يحكملي القاضي كيفاه ناخوهم الفلوس؟

قلتلها: أول حاجةلازم تعرف إلي أحكام النفقة معفاة من معاليم التسجيل وحتى إذا وقع استئناف حكم النفقة هذا الإستئناف لا يوقف تنفيذه وتستخلص النفقة بعد القيام بالاعلام بالحكم عن طريق عدل منفذ ولازم تدفع مشاهرة (بمقتضى حوالة بريدية – مباشرة مقابل وصل – عن طريق عدل منفذ..) وفي صورة ما خلصش تنجم تعملوا عقلة على المرتب أما هذا فقط بالنسبة للاجراء و الموظفين العموميين المدنيين والعسكريين وتنجم تاخو حقك زادة عن طريق صندوق النفقة و جراية الطلاق إلي يقع الالتجاء إليه عند تعذر تنفيذ حكم النفقة البات بسبب تلدد المدين وأما لازم تقديم شكاية في ذلك وممثل هذا الصندوق تلقاه في فروع الصندوق الوطني للضمان الاجتماعي.

قالتلي: ربي يسهل يا وليدي وقيت مالا باش نبدا في الإجراءات.

قلتلها: لازم من توة تبدأ أما أنا ما قتلكش إلي في صورة ما مانفذش حكم النفقة فإنو ذلك يعتبر جريمة يعاقب عليها القانون بالسجن لمدة تتراوح بين 3 اشهر و عام و بخطية من مائة الى الف دينار وحت إذا بدأ يدفع وبعد قص فإنو القانون يضمنلك حقك ويمكنك من رفع قضية جزائية ضدو بمقتضى شكاية ترفع لوكيل الجمهورية في الغرض..

قالتلي: الله ينورك يا وليدي وربي يسهل فيما هو صعيب.

قلتلها: تفضل إنت كيما أمي وفي كل وقت أنا موجود لأي إستفسار آخر إذا تعطلت في حاجة وإلا جاتك موش واضحة وتوة المحامي يزيد يفسرلك زادة وتوة شاهية طيبة وعيدك مبروك وإن شاء الله سنين دايمة.

قالتلي: وإنت بالأمثل يا وليدي.

أعرف حقك… والحق يعلو ولا يعلى عليه