أعرف حقك … الوصية لوارث (التخصيص)….مع سامي القلال
مدام نعيمة مرأة معروفة في الحومة بجودها وكرمها وتخمم على الزوالي والمحتاج وإلي عندها موش ليها وفي كبرها لقات ولدها نجيب إلي قام بيها وشد ساعدها وهي في المقابل حبت ترجعلو من جميلو وتعبرلو على محبتها ليه وتعملو وصية باش ياخو الأرض متاعها وإلي عدا حياتو يخدم فيها الفلاحة مخافة إلي خواتو يخرجوه منها بعد منام عينها، الحاصل وبإعتبار أنو نجيب صاحبي وكيما خويا نهار مشيت بحذاه للدار،
نادتني أمو وسألتني: وليدي كان تسمح إنت ولد الدار ونحب نستشيرك في حاجة.
قلتلها: على ما نقدر بالطبيعة تفضل.
قالتلي: وليدي نحب نعمل وصية للنجيب باش ياخو الأرض إلي يخدم فيها بعد منام عيني ونطمان عليه.
قلتلها: بالقانون وكيما في الشريعة الإسلامية ثمة قاعدة تقول “لا وصية لوارث” وبإعتبار نجيب يعتبر من ورثتك فإنو الوصية بمفهومها العادي ما تصيرش.
قالتلي: معناه الحكاية مستحيلة وما تصيرش.
قلتلها: لا بالعكس ثمة حل وهو أنك تكتبلو عقد تخصيص.
قالتلي: وشنوة هذا يا وليدي؟ شدخلوا في موضوعنا؟ أول مرة نسمع بيه؟
قلتلها: المشرع خلى الإمكانية أنو في حالة كيما هذي تنجم تخصص واحد من الورثة متاعك بإحدى أملاكك وياخوها في منابو في الإرث كيما الوضعية هذي بالضبط وياخوها بدون منافسة بقية الورثة فيها مبدئيا ليه.
قالتلي: هايل برشة الحمد لله، أهو الحل موجود.
قلتلها: أما فيه شروط التخصيص هذا.
قالتلي: وشنية يا وليدي ؟؟؟
قلتلها: لازم الأرض إلي ماشي تخصص بيها نجيب تكون إما تعادل منابه من الإرث وإلا أقل وإذا تكون أكثر من منابو يرجع البقية للورثة ويا إما يعطيهم فلوس كتعويض وإلا يدخلو معاه في الأرض في الزايد على منابو.
قالتلي: الحمد لله يا وليدي الخير بزايد أما أنا خفت لا خواتو يجبروه على بيعها بعد منام عيني وهو خديمتو فيها، أما يا وليدي كيفها تصير هذي نعلم خواتو وإلا نعملو وريقة وإلا كيفاه.
قلتلها: نطبقو نفس أحكام الوصية وهو أنو يا تعملو حجة رسمية عند عدل إشهاد وأنا نشوفها أحسن طريقة وإلا تعمل كتب خطي يكون مؤرخ وممضى منك.
قالتلي: الله ينورك يا وليدي وربي يسهل فيما هو صعيب.
قلتلها: تفضل إنت كيما أمي وفي كل وقت أنا موجود لأي إستفسار آخر إذا تعطلت في حاجة وإلا جاتك موش واضحة وشاهية طيبة يا ميمتي.
قالتلي: وإنت بالأمثل يا وليدي.
أعرف حقك… والحق يعلو ولا يعلى عليه
مواضيع ذات صلة
