أعرف حقك  …عقـــد الـهبـــة… مع سامي القلال

أعرف حقك …عقـــد الـهبـــة… مع سامي القلال

14 افريل، 17:00

سي محمـد راجل ذو وقار الناس الكل تحبو وتستشيرو عند الحاجة يعاون الغني والزوالي ما يرجع حد وحتى كيف تصير خلافات بسيطة في الحومة يكون هو ملجأ لحل كل الخلافات، الحاصل بمناسبة رمضان مبروك عليكم وعلينا وعلى أمة محمد جميع قلت نتعدى نسلم عليه ونباركلو بحلول الشهر الفضيل وناخو دعيوة خير.

أيا سيدي دخلت للمحل وقلتلو: صباح الخير سي محمـد رمضانك مبروك وسنين دايمة.

قالي: صباح الخير يا ولدي، وإنت بالأمثل ربي يباركلك، جابك ربي يا وليدي عندي إستشارة ليك كان تنجم تعاوني فيها.

قلتلو: على ما نقدر يا سي محمـد بالطبيعة تفضل.

قالي: وليدي جاتني البارح منيرة بنت الحومة وقالتلي إلي تحب تعطي الأرض إلى وراء دارها هبة للسمير أما موش عارفة كيفاه تصير.

قلتلو: أول حاجة لا زم تعرف إلي الهبة زوز أنواع ثمة هبة بدون عوض وهبة بعوض، بالنسبة للنوع الأول تعطيه الأرض من غير ما تاخو منو حتى شيء أما الهبة إلي بعوض تعطيه الأرض وتفرض عليله القيام بالتزام معين لصالحها.

قالي: وشكون يكتبلها العقد؟

قلتلو: الهبة ما تصحّ إلا بحجّة رسمية، معناها لازم يكتب العقد عدل إشهاد.

قالي: الله ينورك يا وليدي، وقتنا صعيب وماذبيه الواحد يخلي شقى عمرو تحت راسو تعرفش على الدنيا كيفاه تدور وزيد ثمة ناس تعطيها الغدوة تتنكرلك وماعادش تلفتلك…

قلتلو: في كل وقت تنجم تطلب الرجوع في الهبة في صورة ما إذا أخل سمير بواجباتو نحو أمو منيرة بحيث يكون هذا الإخلال جحودا كبيرا منه وحتى إذا أصبحت الله لا يقدر  عاجزة باش توفّر لنفسها أسباب المعيشة بما يتفق مع مكانتها الاجتماعية وإلا  زادة إذا أصبحت غير قادرة على الوفاء بديونها.

قالي: هايل برشة يا وليدي أما زادت ثمة برشة عايلات ما تجيبش صغار أو العرس وتعطي أملاكها للحد باش يقوم بيهم وبعد ربي يرزقهم بصغير مسكين يتحرم وحتى السيد إلي قام بيهم ينجم يهرب عليهم 

قلتلو: إذا ربي رزقهم بعد الهبة ولدا يمكن طلب الرجوع في الهبة، الهبة ما نجموش نرجعو فيها إلى في ثلاثة حالات وهي إما قيمة الحاجة إلي تعطاة تزادت وإلا إذا تباعت الكلها وإلا إذا تهلكت.

قالي: في القانون كل شيء ليه أجل والرجوع هذا من غير أجل؟

قلتلو: في حالة الجحود حق القيام بطلب الرجوع في الهبة يسقط بمضي عام من يوم حصوله أو من اليوم الي حصل فيه العلم للواهب بالجحود وفي بقية الحالات يسقط حق القيام بعد انقضاء عشرة أعوام من يوم حصوله. وهذا الرجوع ما ينجموش يقوموا بيه ورثة الواهب إلا إذا سبق للمورث القيام بدعوى الرجوع أو إذا توفي قبل مرور عام على حصول الجحود.

قالي: الله ينورك يا ولدي كيما نورتنى هذا الصباح.

قلتلو: تفضل سي محمد ومدام منيرة قلها إذا تحب تعرف حاجة أخرى تنجم تشوف محامي ينجم يعاونها.

أعرف حقك… والحق يعلو ولا يعلى عليه

مواضيع ذات صلة