البرلمان… مغارة علي بابا…المنجي الرحوي

وقت اللي الشعب يعاني المر من المرض والجوع والخصاصة…وقت اللي التلامذة ونواراتنا ما يعرفوش مصيرهم والمصير اللي يستنى فيهم… وقت اللي المتقاعدين والشهارة نهار الكل يهددوا فيهم باش يوفرولهم الشهاري وإلا ما يوفروش … وقتلي بو يخرج وما يعرفش كيفاه باش يرجع وبشنوة باش يدخل لصغارو وما يقدرش يوفرلهم لقمة العيش … وقت اللي خدامة النهار ماعادش عندهم النهار اللي باش يخدموه… وقت اللي صناعيي الحرف نهار الكل يتفرجوا في اللي صنعوه قدامهم وما يتباعش …. وقت اللي تجار الصناعات التقليدية مابقالهم كان ينفظو الغبار على السلعة الراقدة قدامهم… وقت اللي الصناعي الصغير والتاجر الصغير واصحاب المؤسسات الصغرى والمتوسطة ماعادش يرقدوا ويعرفوا النوم من الشيكات الراجعة وتسكير البيبان من البنوك … وقت اللي الفلاحة يعانيو من النقص في الامونيتر والأعلاف ويعانيو من ارتفاع أسعار الأسمدة …. وقت اللي فما في تونس شكون ما عندوش طنجرة يغطيها في رمضان … وقت اللي في ها البلاد الام تعدي نهارها تلاجي وتبكي ما تلقاش دوى لصغيرها والا حليبو… و وقت اللي ناس بهمتها وقدرها وعفتها وانفتها تلزوا باش ولاوا يطلبوا…وقت اللي الوباء يحصد في الأرواح وعاطي مسد ماغير حتى إجراءات جدية من حكومة الذل والاهانة باش تجابهو وتعمل اللي يلزم تعملو كل حكومة وطنية تخمم في شعبها…..في الوقت هذا الكل مجلس النواب يعدي الاسبوع القادم مشروع قانون العفو على الكناطرية ايه الكناطرية واللي هربوا فلوسهم للخارج…اتوا تشوفوا نسبة الحضور و التصويت كيفاه تولي عالية ويستنفروا قواهم باش يتسابقوا ويتنافسوا على شكون يدافع اكثر من غيرو على ها القانون…برلمان عصابة وكمشة مجرمة لابسين رابطات عنق ومكيجين ويتكلموا بالعربية الفصحى ولابسين الزي متع التجارة بالدين ويبداوا خطاباتهم باسم الله ويزينوه بآيات قرانية…تعرفوشي علاه باش يعديوه القانون توة؟ على خاطر تونس صادقت على اتفاقية التبادل الآلي للمعلومات اللي باش تبدى توة حيز التنفيذ ويتكشفوا اللي عندهم اموال في الخارج….امالا عندهم برلمان يخدملهم الخدمة يعمللهم قانون عفو قبل ما يتكشفوا ويتعاقبوا… يعمللهم عفو و يمنعهم ويضرب الباكو علاه لا…فهمتوشي هالحكومة حكومة شكون وهالبرلمان برلمان شكون…حل البرلمان واجب