المسرح الصيفي بسيدي منصور: يا “مسكون بالجان ” يا رزقو جرّاي …

الي قاعد يصير في مهرجان صفاقس وفي المسرح الصيفي بطريق سيدي منصور ما عندوش تفسير …الهيئة تقول قصينا 6400 تذكرة فقط والبقية دعوات واشتراكات وتذاكر مجانية واعدادها موش كبيرة …الي يسمع هكة يقول الجو باز مريقل والحفلة مريقلة والجمهور ماشي يقعد متنفس ومرتاح

قدّام المسرح مئات من الشباب يطالبوا بالدخول ومن حقهم على خاطر تذاكرهم معاهم وشراوهم بفلوسهم موش بحاجة اخرى وشيء محزن يقص ويجي من اماكن بعيدة ويعلم بيه ربي وين يبات وداخل المسرح هرج ومرج وعياط والحماية تقرر ما عاد يدخل حد وهو من حقهم وكلنا نتذكروا كارثة ستار اكاديمي

ثماشي شكون يعرف عفريت متاع math وطيارة يحل اللغز ؟ 9000 في المسرح والقصان 6400 اكهو ونقولو 1000 تذاكر ودعوات بلوشي …ايه البقية منين جاو ؟؟ يطلعوشي من تحت باسمالله ؟ هبطوا من فوقنا اللطف ؟ ثمة خلل يا سي الوالي وانت مطالب بكشفوا والاستماع للهيئة والحماية والامن وما تقوللناش نجيبوا عزامة يعزموا …

وزيد ما تقليش ما تعرفش لب المشكلة منين ؟

باهي فكنا مالحديث هذا واعطينا الحل ؟ حسب رايي المتواضع

1- قانون جديد للمهرجانات على مستوى التنظيم والاعداد والهيئة

2-فرض اعوان اختصاصهم المسك بزمام الابواب دخولا وخروجا باش نتغلبوا عالفويت ويلزم تخصيص ميزانية خاصة بيهم ويكونوا تحت اشراف هيئة المهرجان حتى يتحملوا هوما والهيئة المسؤولية كاملة بعيد على كل الاطراف الاخرى

3- لتفادي كل الاتهامات ابعاد الامن على ابواب الدخول وتكليفهم بحراسة المسرح من خارجه

4- ابعاد بعض الاشخاص الي ملينا من تواجدهم في الابواب ويساهموا في الفويت

5- اقتطاع التذاكر الكترونيا وتجهيز الابواب بالات متطورة حتى لا تفتح الا لصاحب التذكرة او البطاقة او الدعوة

ممكن تتصلح الامور ونبعدوا على رمي الاتهامات في كل الاتجاهات على خاطر ضاع حق المئات الي تحرمت من الدخول وربما ما تتكررش الفرصة قدامهم وارجاع فلوسهم موش حل ..والاعتذار ولو هو حاجة باهية لكن كيف يتكرر ولنفس الاسباب يفقد المعنى متاعو

حافظ