اليس فيكم رجل رشيد …؟؟؟ … عبد الكريم قطاطة

مهبول ابن مهبول ابن مجنون من يقول انّ تونس قبل 25 جويلية وبعد 25 جويلية امورها لاباس …. والمشكلة وين ؟ جماعة ما قبل 25 جويلية 2021 يتشمتوا في من اتى بعد 25 جويلية وكانّهم لا دخل لهم فيما حدث … وجماعة ما بعد 25 جويلية مازالوا ما فاقوش انّ تونس ليست بخير …ويبقى الشعب الكريم هو اللي يدفع في الفاتورة .. فاتورة الضوء مع العلم انو قليل وين ثمّة ضوء … وفاتورة الماء مع العلم انو باش تلقى دبوسة ماء يلزمك تعمل ساعات 50 كلم … اما باش تمشي 50 كلم ؟؟ تي هو البنزين مقصوص .. برشة دازين عليها ب _ ربي يقدّر الخير .. صحيح الربّ قال في محكم بيانه … ادعوني استجب لكم …. اما قال زادة … وقل اعملوا … وزيد عاد هاكي المعارضة السمحة والنخب النّكب الاسمح … مسيرات فيديوات تظاهرات ومظاهرات ونفس الشعارات .. لا برامج واضحة للتغيير لا مشاريع شفافة للتغيير .. وتجي تكلمو ينزل على الفلسة ويفشلم علينا باسقاط الانقلاب وبعودة الديموقراطية .. يخخي ما فهموش انو الشعب فاق بيهم وعرف انهم يبحثوا ويدافعوا على الكراسي والمناصب اكثر من دفاعهم عن تونس ..وعمّك الفيسبوك وعمّك مارك هو اكثر واحد شايخ علينا … صحّة ليه لقى لايدو … اليس فيكم رجل رشيد ..؟… صحيح زمن المعجزات ولّى اما وصلت لحالة من التهلويس اني اصبحت من الذين ينتظرون معجزة حتّي يظهر ذلك الرجل الرشيد …ومعذرة على تهلويسي … 25 اوت 2026