اليوم تذكرت هاكة الطفل عبدالكريم … في محنتو مع الكورة …عبد الكريم قطاطة

انا عشقت الكورة مللي كان عمري 10 سنوات حليت عينيّ وقتها على السي اس اس والحمد لله على تلك النعمة … وعاصرت الكورة العالمية وكنت من انصار البرازيل زمن العملاق بيلي …وكنت زادة نلعب الكورة واللي لعبو معايا في الحومة وفي نادي اذاعة تونس واذاعة صفاقس يعرفوني مرامدي و ما نحبش الخسارة حتى بكورة شوالق … وكبرت ووليت كيف اغلب المغرومين بالكورة متعصّب للسي اس اس وزادة ثمّة فرق ما نجمتش ولحدّ الان نحبّهم وعمري لا تمنيتلهم الربح لا محليا ولا افريقيا .. اوكة ما نحبش نكذب عليكم .. وانا نعرف انهم عندهم انصارهم وما حاجتهمش بحبّي لناديهم … يهودي واعطيه حقّو … حتّى في مسيرتي الاعلامية عمري ما آمنت بلوبانة الحياد في الاعلام الرياضي …وكنت اقول ذلك للجميع ..اما عمري لا تجاوزت حدودي …صحيح مع تقدّم السنّ تغيّرت واصبح التفوق ولو نسبيا لعقلي على قلبي …اما ثمة حاجات ما تبدلوش فيّ 1 حبّي للسياساس العشق الكبير .. 2 حبّي لريال مدريد .. 3 فريق في تونس واخر عربي واخر اوروبي ما نجمتش نحبهم ومستحيل نحبهم … وبقيت زادة وفيّ لمسقط راسي ساقية الدائر …اما نسيت ما قلتلكمش اني نحبّ التنبير سواء كنت انا المنبّر او المنبّر عليه .من غير تطييح قدر ونحاول يكون بفيانة … اش قولكم تاخذو تنبيرة اليوم ؟ اليوم انتهت مباريات الجولة الاولى لبطولة الرابطة الاولى لكرة القدم التونسية واكيد تعرفوا النتائج . لكن ثمة حاجات ربما برشة ناس ما تفطنوش ليها ايّة شدّوا الحساب 1 اول هدف تسجّل في الموسم سجّله تقدّم ساقية الدائر _ نحكي على التوقيت في مقابلات امس واليوم _ 2 اوّل فريق يسجّل ثنائية في 4 دقائق الاولى هو تقدّم ساقية الدائر .. وبعد نتائج امس واليوم هل تعرفون من هو المتصدّر في الترتيب ؟ الترجي ؟ لاااااااااع ..الافريقي ؟ لاااااااااع … البنزرتي ؟ لااااااااااااااااااااااع … جرجيس ؟ لااااااااااااااااااع .. هذي هي الفرق المنتصرة بين امس واليوم … باهي فهمناك قوللنا شكون متصدّر الترتيب … ساقيتنا ساقيتنا ساقيتنا بفارق الاهداف .. سجّل يا تاريخ .. انا متاكّد انو البعض يقولو ما يسبق للسوق كان الخضّار .. ايه شبيه الخضّار ما خلقوش ربّي ؟ موش خدّام على روحو ؟ هذا راهو عبدالكريم الطفل المشاغب ايام زمان هو اللي يحكي اما عبدالكريم العجوز يعرف انو منطق الكورة هو اللامنطق وخاصة اذا دخلت فيها الحسابات ودخلو هاكة الجماعة متاع قنوات العهر الرياضي . مثلا ا هاكة المختا ر متاع غرغر يا غراب يوخّر ويقدّم وبكلّ قلّة حياء ويقول اذا ربحت الافريقي البطولة هذا الموسم انّحي السروال ؟ اي نعم وعبد الرزاق قريب يترشقلو عرق بالضحك _ فرحان قوي _ اذن اختم بالقول انا نعرف انو التقدّم عمل بداية ممتازة ولكن كل الاحتمالات ممكنة في قادم الايام ..عندي سؤال اخير للمختار … اش تعمل لو كان التقدّم تربحلك الترجي متاعك ؟على كل حال الله لا يحضرنا محاضر سوء ….وعاشت السي اس اس وعاش تقدّم ساقيتنا وعاشت الفرق النظيفة وتونس بكلّها تعرف … 23 اوت 2026