جيبو كفاءات تسيّر تونس…رانا ماشين للهاوية….الفة يوسف

وليدات وبنيّات توانسة كيف الورد يصنعو في ربيع البلدان الغربيّة..من مهندسي طاقة لإعلاميّة لخبراء في الاقتصاد لباحثين في الصّحّة وغيرهم…
وليدات وبنيّات لو كان يعطيوهم القرار توّ يطيرو بالبلاد في سنوات قليلة…يلقاو حلول لمشاكل اليوميّة…وللاقتصاد…ويفكّرو في بدائل الطّاقة واستتباعات الذّكاء الاصطناعيّ ويعملو رؤية للمجتمع ثقافيّة وتعليميّة وقيمية بالخصوص…
علاش يا ربّي كفاءاتنا البرّة وبإمكانهم يلقاو الحلول، وأحنا ندورو في حلقة مفرغة توّ سنين وسنين؟ الله لا تربّح الحسابات السّياسيّة والصّراعات على السّلطة والمشاكل الإقليميّة والجيوستراتيجية…يا ناس احكموا، خوذوا الامتيازات، شيخو بالسّلطة…أما على الأقلّ جيبو كفاءات تسيّر تونس…رانا ماشين للهاوية…اللهم إلا إذا كان ثمّة برنامج ثوريّ باش نموتو الكلّ…هكّاكة نقول لكم: بصحّتكم…