سهرية” النوردو”…او شتّان بين الرّاب و الفوندو

اية سيدي البارح حضرت و تقمقمت في الصفوف الأمامية زادة هههه….مالثمانية و نصف لنصف الليل على فرد جنب.. ..الحدث البارح كان سهرية نوردو او النوردو…نتصور الالف و واللام لايزيدو لاينقصو..المهم صاحب الشعر المصبوغ الاصفر و اللحية السوداء عبٌى ستاد قرمدة البارح و عبٌى سطوحات العمارات الي بجنب الستاد و حتى مالشارع مالسبعة متاع العشية شهد ازدحام على غير المعتاد ….العشرة متاع الليل….الضو طفا و الصياح علا….و خرج نوردو لابس مريول أخضر فاتح تحول مالنصف ساعة لولانية بعد الشطيح و الرديح الى أخضر ملوخية …. في الحقيقة هو على الركح خفيف ظل. …ايه. …و خفيف حركة زادة يتنقل من طرف الركح لطرف الركح بكل رشاقة و حب ….و اكتشفت فيه الجانب الانساني زادة …كان يغزر للشباب الي فوق السطوحات و مرسكيين بحياتهم بخوف و فرحة و يقول،”سايسو ارواحكم..هاني معاكم بالله ردو بالكم على ارواحكم..”…و في وسط السهرية …غزر للجهة الي انا فيها قلت مااقول سعدي تلقاه داهش فيٌ قاعدة نتفرج باهتة لانغني لانشطح..ياخي قال” أمي الغالية ربي يفضلك لي “..قلت في قلبي “لاعاد مانجيش قد امك موش لهالدرجة.. .و اتلفتٌ ورايا نلقى بالحق أم نوردو و هي أصيلة ولاية صفاقس كيما قال البارح للجمهور …مرا ماتبعدش علي في العمر ..يمكن هو كبيرها …عدات الليل كلو واقفة تغزر لولدها و تصلي عالنبي.. المهم …هو يدندن فوق الركح و انا باهتة في تفاعل الشباب الي حضر….البعض منو تلامذة ابتدائي..وحدة منهم قالتلي “يا تتا بالله سامحني نحب نصور ” غزرت نلقاها فرد طول هي و الكرسي.الي انا قاعدة عليه …و تصيح على قوة جهدها نوردووووو …نووووووردوووووو…..جمهور الكراسي…عدى السهرية واقف فوق الكراسي …و جمهور المدارج ….يزيد شوية و يسالهم.”.لفوق سافا ؟؟.”.يناديو كاينهم يغنيو .”.سافااااااا…..نوردو سافااااااطبعا تعرفو الي لاي رابور” يغنيو بلاي باك. مسجل .معناها …و نوردو رابور لكنو حاول يغني حويجات لايف بصوتو الي بصراحة حسيتو البارح ضايع و تاعب و ماهواش… مخدوم…..نعطيكم الصحيح ..هوما ثلاثة غنايات كل غناية عاود غناها ثلاثة مرات و بين الغناية و الغناية ….موسيقى شبابية خفيفة و هو يقول “قرمدة يا….صفاقس يا….سيدي منصور يا…..هههه مازال معدل على المسرح الصيفي سيدي منصور …و في كل مرة باش ياخذ نفس خاطر ظاهر تعب برشة يتوجه للجمهور و يقول ..انا فرحان فرحتوني يفرحكم ربي ……كاينو هو بيدو موش مصدق طوفان الشباب الي جا البارح ….باش يسمع و يغني و يصيح ……حتى الكهول كانوا موجودين صحيح …اما .بنسبة اقل مالشباب ….كنت انجم نحضر تحت حس مس و مانقولش في صفحتي و مانعديش مباشر باش مايقولوش كان هاذي شاعرة و مثقفة و مربية أجيال دخلت مالا مانلوموش عالاخرين…لكني متصالحه مع ذاتي و قناعاتي و بالحق حبيت نحضر باش نشوف بعيني و نسمع بوذني و نكتب في صفحتي علي عشتو موش الي عاشو غيري….هلي يقدم فيه نوردو لاهو من ذوقي و لاهو من اختياراتي الفنية هذا انا متأكدة منو قبل مانحضرلو…و زيد الحس متاع الموزيكا كان قوي و يكسر الراس لين البارح مانجمتش نرقد و كيف رقدت حلمت بروحي مازلت في المهرجان و دخت و جاء النوردو يبخ فيٌ بالماء باش نفيق هههه والله كيما نحكيلكم.. لكن باش نفسرو هالنجاح؟؟ هو ظاهرة…موضة …توندونس هههه .فازة من فازات الشباب ….و نوردو شاب لعب علي يحبوه…موسيقى صاخبة….طاف طاف ..دوف دوف …يا ..يا…يا…..و هوما ينقزو كي العصافر قريب يبكيو مالفرحة . . ماثماش علاش باش نقصٌو جناح فرحتهم و الا باش نسكرو عليهم قفص الدنيا و نقولولهم ارجعو بالسيف اسمعو عبدالحليم و نجاة و نعمة و…..لكن بذكاء كيما ندخلو معاهم للراب كيما ندخلوهم معانا اسهريات الطرب الجميل باش يعرفو اصلهم الفني على الأقل..و مايكبروش من غير هوية فنية عربية تونسية أصيلة مالحاجات الي عجبتني في نوردو انو كان محترم في حركات يديه و صوابع يديه ليلة كاملة مستوية و محترم زادة في لبستو…و السروال شادد بلاصتو ماهواش طايح كي لخرين ..زيد واحد مالجمهور اقترح عليه غناية ظاهر فيها كلام خايب ياخي قلو “لا صاحبي الجو مخلط هوني “….حبيت نقول الي ظاهر الي نوردو ولد عائلة و طيب و متواضع و انا احساسي مايخيبنيش لكن الي قدمو البارح و انا مكهبة عالخمسين مافادنيش و ما أطربنيش…و الدنيا أذواق و ربي يعينو ….و يوفقو ….السهرية البارح كانت ناجحة بررررشة نحبو و الا نكرهو…تنعويشة سمحة لخزينة المهرجان و امتياز في الإدارة و التنظيم و انتشار قوي و حازم للأمن….أحلى مهرجان فيك يا صفاقس ..مهرجان قرمدة

امال كعنيش العيادي