صفاقس : كتبلها ربي تعيش في الميزيريا….

مللي خرج الإستعمار وبفضل بورقيبة صفاقس تعاني آهو قائد الجهادين الزعيم الحبيب بورقيبة رزاها في شطوطها كي عطى أوامرو ونبّت ال ن/ب/ ك N P K كنا بثلاثة شطوط يعومو فيها الصفاقسية من هاك الوقت السماح .
زيد التهميش لا طرقات واسعة ولا محولات مدروسة ،باب البحر في ظرف ستين سنا تزادو فيه قد صوابع يديك عمارات العالي فيها سبعة طوابق ،امشي شوف الصباح شوارعها وخاصة شارع بن علي ( 7 نوفمبر) وشارع قرطاج توة تشوف العجب بالرصان
اوكا بورقيبة عوضلنا ضرر الشطوط بضرر أكبر منو ( حزامو اللهي بارك) قنواتو ماء راكح وزبلة وناموس وفيران ، يعطيه ألف خير .
زيد الزبلة اللي ولات فطورنا وعشانا ،ولو كان نقعد للصباح نعد ونحصي في ميزيرية صفاقس ما نوفاش .
والأغرب من كل هذا موضة جديدة ترمات على صفاقس ” الأفارقة” عددهم في صفاقس قد عددهم ولا أزيد في باقي ولايات الجمهورية .أيا الأحياء قبلناهم يجبر ربي أما الأموات كيفاش نعملو معاهم عباولنا قسم الطب الشرعي والمقابر تي الصفاقسية ولاو خايفين لا يجي نهار وما يلقاو وين يدّفنو .
شد عندك توة قريت خبر في هذا الموقع بالذات يقولو فيه اللي 97 جثة إفريقي تستنا طريقها للتشريح في صبيطار قائد الجهادين يعجبكشي هذا ملا زهر عند الصفاقسية يكسّر الحجر
اوكا قلك اولادها ينجحو هوما لولين في الإمتحانات الوطنية وفي التعليم العالي والواطي وبعد قال شنو يهربو إما للخارج وإلا للعاصمة آش انزمرو بيهم وقت هوما هكا ،زادوا صفاقس ميزيريا على ميزيرتها موش لو كان نجحو متوالا خير .
ما عندكش زهر يا صفاقس إبدا من اول رئيس بعد الإستقلال حتى للي جاو بعدو كلهم يمصو خيراتك ويضحكو عليك وكملو بيك اولادك الناجحين في القراية البراني وولادك فرد عجنة صنعولك أحلى ميزيريا غاطسة فيها حتى لخشمك .

مَحمد التركي _ صفاقس