مُضيفة طيران مع شركة سيفاكس : ما سمعناه اليوم في موزاييك بالحق مهزلة

قالت غادة بن رمضان وهي مضيفة طيران سبق لها ان عملست مع شركة سيفاكس آرلينز معلقة على ما اورده البلومي في إذاعة موزاييك :

“بالرغم انو انا من الناس المتضررة من سيفاكس اما اللي سمعتو توا بالحق مهزلة
انا من اول الناس اللي دخلت سيفاكس من قبل متحل اصلا و رحلات صبيحة كنت اغلب الوقت انا اللي نخدم عليها و carnet de vol يشهد
باه نبداو بالنقطة بالنقطة:
حكاية نلبسو سروال و نقللو مالمكياج كانت على رحلات طرابلس ليبيا فقط بحكم انو الركاب اغلبهم لو موش كلهم ليبيين باش متصيرلناش مشكلة معاهم و الشركة مفرضتش علينا نلبسوه السروال قالت من المستحسن اما على رحلات صبيحة مصارش على خاطر اغلب الركاب تجار و الا رحلات سياحية عن طريق وكالات اسفار و انا كل رحلاتي على صبيحة عمري مشكيت في واحد انو ارهابي و كلمة الحق تقال
ثانيا الرحلات اللي اتخدمت من مطار طبرق كانت رحلات عمرة و صحيح البلاد مكانتش راكحة جملة و بتنا غاديكة و كرتوش سمعناه و خفنا اما الرحلات اللي خدمناها كانت لجدة و carnet de vol يشهد
الكابتن اللي قلتو فرضو عليه يعمل دعاء السفر موش صحيح الكابتن اللي كان معانا انسان محترم و راجل تقي و هو من نفسو حب يعمل دعاء السفر و فيبالي حاجة باهية نبداو بيها رحلتنا خاطرنا بين فضاء و هواء و انا توا نخدم في السعوديه في كل رحلة السيستام اوتوماتيك يخدم دعاء السفر موش معناها فما دعاء سفر يعني ارهاب و دواعش و الشركة نفسها قاتلو معادش تعملو خاطر ما شاء الله عندنا ركاب ملحدين اتقلقو منو و الكابتن ami معايا في الفايسبوك و يقرا كلامي
في سيفاكس من اخر 2012 انا chef de cabine لين خرجت مالشركة و لا عمري نهار جاني حد قلي متكتبش rapport و لا غطي على رحلة.
هي فمة رحلة بركا كانت حساسة خدمناها تابعة الجيش الليبي خذيناهم عندهم تدريبات في بروكسيل و معاهم كولونيلات الجيش الليبي يعني اكيد مهيش باش يكونو دواعش يعني
رغم مشاكلي مع الشركة و متضررة منها برشا و لتوا نسالهم فلوس اما الصراحة الفيديو نرفزني ياسر خاطر الكلو كذب و لو كان اللي قلتو عليهم مضيفين و جايبينهم يتكلمو ami معايا نقلهم حسبي الله ونعم الوكيل خاطر حتى لوكان الشركة كلاتنا في فلوسنا ميصيرش نعطيو شهادة كذب.”