ناقصينك احنا ياميدو …عبد الكريم قطاطة

السخانة وقصّان الضوء ..وقصان الماء .. خلّات الواحد خلوقو في خشمو ..وهاكة ولد العبدلّي يعمل هكّة ويهبّط فيديو يعلن فيه عن ترشحو لرئاسة تونس ..لهالدرجة تونس كبّ ربّي سعدها ؟ لا ويحكي بجدّو موش يتضومر كيف عاداتو .. ويا ريتو كان تضومير .. بل تقوعير متاع 5 نجوم .. صحيح وضعنا غامض … صحيح تعبنا … صحيح الاعصاب تحرقت .. اما يوصل بينا الحال باش واحد كيف ولد العبدلّي يطيّح قدر تونس وعلى فكرة موش الوحيد اللي قدّم السيفي متاعو باش يولّي رئيس .. والمخيّر فيهم حتّى عمدة في منطقة ريفيّة يستحيل يوصلّها ..مرّة اخرى صحيح امورنا وامور بلدنا داخلة في حيط .. اما لكلّ الطمّاعة ..راهي تونس اكبر من الطمع متاعكم واكبر من مسرحياتكم ..واكبر من غرفكم السوداء .. قيل الكثير عن الثورة وعن مآسيها وعن الاحلام التي تحوّلت سريعا الى كوابيس لكن ميزة تلك الثورة وربما الوحيدة انّها حوّلت اغلبية الشعب من قطعان لا عقل لها الى اناس استفاقت للاعيب الانتهازيين وربّما اصبح شعارها الوحش ولا الاذيّة .. واللي زلبحونا اوّل مرّة الله يسامحهم .. اما رغم كلّ المعاناة التي نعيشها ورغم جبال المشاكل التي تمرّ بها تونس ..لن نستثيق الاقوام الطامعين… ومرّة اخرى وللتذكير انا لست زقفوني بل اعتبر الزقفونيين قطيعا ككلّ القطعان الاخرى واشفق عليهم كما اشفقت على القطعان الاخرى ..ولا عاش في تونس من خانها .