نعم.. دفاعا عن دحمان… عبد الكريم قطاطة

كثرت التعاليق في المدّة الاخيرة عن حارس الغالية وحارس المنتخب ايمن دحمان … هل سيجدّد ؟ هل سيغادر ؟؟ ولئن كانت بعض التعاليق مصدرها حبّ النادي والدعوة لعدم التفريط في حارسها الاوّل فانّ بعضها الاخر مصدره خبث وعفن ..لانّ اصحابها يزعجهم وجود حارس عملاق في قيمة دحمان في السي اس اس… واذا المتحدّث مجنون يكون المستمع عاقل .. كل لاعب من حقو انو يكون عندو طموح للاحتراف ..وطبيعي جدا انّ اغراء المال امر منطقي عند ايّ بشر .. خاصّة انّ اوضاعنا المالية في السي اس اس نعرفوها الكلّ على قدّها ..ومن الصعب تحقيق ما يريده ايّ لاعب ينوي الاحتراف .. اخلص للقول انو من حقّ دحمان ان يطمح للاحتراف وضمان مستقبله الكروي وخاصة المادّي … بشرطين رئيسيّن اولهما عدم نسيان ناديه في الحصول على نصيب مادّي من عرضه ..وثانيهما ان يكون الاحتراف خارج تونس _ وما يعملش كيف هاكة الجماعة اللي يصرّحو انا في تونس ما نلعب كان في السي اس اس وهوبّا نلقاوهم بعد ايامات في هاكة الفريق اللي تونس بكلّها تعرفو .. دحمان قالها عديد المرات خاصة وهو ابن الفيراج _ انا ما نحترفش في فريق تونسي ..انا عندي ثيقة فيه وفي بوه اللي حكيت معاه في مناسبة فارطة … اختم بالقول .. دحمان يستحق كلّ خير نظرا لما قدّمه لناديه ومن حقّه الاحتراف والنادي لم ولن يقف يوما على ايّ حارس مرمى من التوهامي وشبشوب رحمهما الله الى عبد الواحد عبد الله الى قريش واللجمي عامر والقائمة طويلة … فقط كون راجل يا دحمان وما تعملش كيف هاكة الجماعة … وهنا نحب نزيد حاجة للتوضيح ..راهو من حقّ ايّ لاعب في عصر الاحتراف انو يختار الفريق اللي يحب يمشيلو .. اما من غير نفاق وترهدين من نوع ما نلعب في تونس كان في الفريق متاعي … وفي رواية اخرى كون صيد وكولني …