أستاذة تكتب : نحب نسأل الأولياء ..علاش صغاركم جاونا هكّة السنا؟؟؟

أستاذة تكتب :
بالطبيعة نستثني التلامذة الممتازين الي جايين باش يقراو..التلامذة المتربيين الي يحترمو أساتذتهم و وجودهم في القسم نعمة من عند ربي …
لكن يا وخياني شنوة هالجيل هذا ؟؟🙄
شبيهم تلامذتنا ولاو هكة؟؟🙄
علاش هالفوضى و هالتقاعس و هالاهمال 😳
زعمة وين الإشكال؟؟🤔🤔🤔
الدرس ماهواش قاعد يمشي كيما يلزم
لازم نقصيو عليه باش نحزو عركة بالكلام بين زوز تلامذة هاك قلو “اش يهمك” و لاخر قلو” سكر فمك “
لازم نقصيو باش نشدو تلميذ بالكمشة في يدو البورتابل زعمة زعمة يشوف في الوقت و شوف عاد هاك التبرير معناها يحب يقلك يا مدام و الا يا مسيو راك طولت علينا و الوقت ما حبش يتعدى في حصتك
لازم نقصيو باش نفيقو بتلميذ عندو كمشة أوراق مقطعين مسميهم كراسة 😣و تجي تعمل ٧ليها طلة تلقاها عربية على إنجليزية على مدنية على سكور متاع فريق مفضل و بين الصفحة و الأخرى تظهر موهبتو الفذة في رسم جماجم و قلوب حب
لازم نقصيو باش نخرجو تلميذ إقصاء خاطر ملي دخل و على امتداد ساعة كاملة و هو يغزرلك و يضحك تقول يشوف في مشهد لعادل إمام وقت الي انت منظم في لبستك و حضورك و درسك و ما ثمة ما يضحّك
من غير ما نحكيو على “يزي””اركح””اهفت”ريض”في وسط القاعة …..
تلميذ العام هذا ماهواش كي عمناول (و ديما نستثني و هوما يعرفو ارواحهم) للأسف ما عادش نحكيو على أقليّة ولينا نحكيو على أغلبية فوضوية حركية …ما تحبش تركز معاك و اذا صار و ركزت فيسع تقلق و طاقة تركيزها محدودة..اما .ماشاءالله ما عندهم وسع بال و ذاكرة كان للتلفونات و الانستا و التيكتوك. و الساي اس اس و ريال مدريد و برشلونة و البطلة الي خلاها حبيبها وحدها و هج لأزمير
يا والله تيار كبييييير…😳
الي تسألو من الإطار التربوي و موش كان مالاساتذة برك يقلك نحس في روحي كايني في آخر العام….الي تشكيلو يشكيلك…..جيل تحسو جاي يقصر في الوقت…والديه جايبينو يقرى بالسيف عليه …و يمكن محسسهم الي هو كيف يجينا راهو عامل عليهم مزية أصل…
جيل كان عاقبتو.. نقم عليك …
و كان سامحتو… شم عليك الهف و فلت من يديك
جيل ما تنجمش تحكي معاه بالعاطفة خاطر المشاعر عندو ما لازمهاش تكون مع الاستاذ
..جيل ما يشوفش في أستاذو بوه و إلا أمّو…..
و ظروف الأستاذ الاجتماعية و النفسية آخر همّو 😥
نحب نسأل الأولياء..ياخي صغاركم علاش جاونا هكة السنة؟ و زعمة انتوما حايرين معاهم كيفنا؟ و الا هوما في الدار نوع و في المؤسسة التربوية نوع آخر
بالكش كابسين برشة عليهم عندكم هاك علاش يجيو يفجرو مواهبهم عندنا هوني …
تي فهموني؟؟؟؟؟

آمال كعنيش ام عزيز