مفقود مفقود مفقود يا كبدي …. عبد الكريم  قطاطة

مفقود مفقود مفقود يا كبدي …. عبد الكريم قطاطة

17 نوفمبر 2026، 21:15

تعادل بحجم الخسارة . اليوم امام الشقيقة ليبيا .. نعم … التحكيم كان سيئ … نعم .. زعمة التحكيم ما كانش سيئ في بعض مقابلاتنا تجاه فرق اخرى ولفائدتنا ؟ … عندنا ممرنين تونسيين اكفاء ؟ باستثناء الشتالي وفوزي البنزرتي ما عندناش ويززونا من لوبانة الوطنية والدفاع عن الممرنين التونسيين … عندنا ممرنين شبان توانسة يبشروا بخير ؟ لا ما عندناش كلهم خريجي حضبة وقول … اقول هذا و الارقام معايا ..كل الفرق الوطنية من فئة 17 سنة الى فئة 23 سنة الى الهسكّة متاع الفريق الوطني انسحبوا من التصفيات … تحبوا اكثر من هالدليل ؟ الشتالي عام 78 ترشّح لكاس العالم بالارجنتين في ظروف ما ثماش ما اصعب منها فريق واحد وقتها يمثل افريقيا …اما وقتها كان عندنا ممرن بالحق ..ولاعبين بالحق .. وجامعة بالحق .. ووزارة بالحق …وتوة هالبطيون الكل موش موجود … تي ايّ شخص في ايّ موقع اذا يفشل ينسحب ويكرم لحيتو بيدو … هذا موجود ؟ انه مفقود مفقود مفقود يا كبدي . …لو كنت مسؤولا عن قطاع كرة القدم _ لاقدّر الله _ لقرّرت انتداب ممرن اجنبي واهديته فريق ما دون ال23 سنة واعطيته بطاقة خضراء لمدّة 5 سنوات … توة معقول مازلنا نلعبو بشيوخ في كرة القدم سنّا وعطاء … لم اذكر ايّ اسم لانّي لست من هواة ذكر الاسماء كما يفعل جلّ اعزاءنا الكرونيكارات لا اعزّهم الله .. التشخيص الحقيقي في كرة القدم ان نغوص في جذور مشاكلها وبطرق علمية اولا وخاصة بوطنية .ومع اناس ثقات ودمادم بالحق ويحبوا تونس بالحق .. هذا حاليا مفقود مفقود مفقود يا كبدي … يا كبدي .. قولوها كيف ما يقولها العندليب في قارئة الفنجان موش كيف هاكة السيدة متاع البلارة .. شفتو قداش عندنا خنّار في هالبلاد ؟ لك الله يا كرة القدم ولك الله يا تونس 17 نوفمبر 2026

مواضيع ذات صلة